БОГОСЛУЖЕНИЕ БОГОСЛУЖЕБНЫЕ ПЕСНОПЕНИЯ СТАТЬИ ФОТО И ВИДЕО ЗАДАТЬ ВОПРОС ССЫЛКИ

Тропари воскресные на " Бог Господь"
Хор:	1 глас Камени запечатану от иудей и воином стрегущим Пречистое Тело Твое, воскресл еси тридневный. Спасе, даруяй мирови жизнь. Сего ради Силы Небесныя вопияху Ти, Жизнодавче: слава Воскресению Твоему, Христе; слава Царствию Твоему; слава смотрению Твоему, едине Человеколюбче.
Хор:	Богородичен Гавриилу, вещавшу Тебе, Дево, радуйся! со гласом воплощашеся всех Владыка в Тебе, Святем Кивоте, якоже рече праведный Давид; явилася еси ширшая небес, поносивши Зиждителя Твоего. Слава Всельшемуся в Тя, слава Прошедшему из Тебе; слава Свободившему нас рождеством Твоим.
Хор:	2 глас. Егда снизшел еси к смерти, Животе Безсмертный, тогда ад умертвил еси блистанием Божества. Егда же и умершыя от преисподних воскресил еси, вся Силы Небесныя взываху: Жизнодавче, Христе Боже наш, слава Тебе.
Хор:	Богородичен Вся паче смысла, вся преславная Твоя, Богородице, таинства, чистоте запечатанной и девству храниму, Мати позналася еси неложна, Бога рождши Истиннаго; Того моли спастися душам нашим.
Хор:	3 глас Да веселятся небесная, да радуются земная; яко сотвори державу мышцею Своею Господь, попра смертию смерть, первенец мертвых бысть; из чрева адова избави нас, и подаде мирови велию милость.
Хор:	Богородичен Тя, ходатайствовавшую спасение рода нашего, воспеваем, Богородице Дево; Плотию бо от Тебе восприятою Сын Твой и Бог наш, Крестом восприим страсть, избави нас от тли яко Человеколюбец.
Хор:	4 глас Светлую воскресения проповедь от Ангела уведевша Господни ученицы и прадеднее осуждение отвергша, Апостолом хвалящася глаголаху: испровержеся смерть, воскресе Христос Бог, даруяй мирови велию милость.
Хор:	Богородичен Еже от века утаеное и Ангелом несведомое таинство, Тобою, Богородице, сущим на земли явися Бог, в неслитном соединении воплощаемь, и Крест волею нас ради восприим, имже воскресив первозданнаго, спасе от смерти души наша.
Хор:	5 глас Собезначальное Слово Отцу и Духови, от Девы рождшееся на спасение наше, воспоим, вернии, и поклонимся; яко благоволи Плотию взыти на Крест, и смерть претерпети, и воскресити умершия славным воскресением Своим.
Русский текст 5 глас: Прославим, верующие, безначальное, со Отцем и Духом Слово (Сына Божия), для нашего спасения родившееся от Девы, и поклонимся Ему; ибо Оно (Слово) благоволило Плотию вознестись на Крест, претерпеть смерть и воскресить умерших славным Воскресением Своим.
Хор:	Богородичен Радуйся, двере Господня непроходимая! Радуйся, стено и покрове притекающим к Тебе! Радуйся, необуреваемое пристанище и неискусобрачная, рождшая плотию Творца Твоего и Бога. Молящи не оскудевай о воспевающих и покланяющихся рождеству Твоему.
Хор:	6 глас Ангельския Силы на гробе Твоем, и стрегущии омертвеша; и стояще Мария во гробе, ищущи Пречистаго Тела Твоего. Пленил еси ад, не искусився от него; сретил еси Деву, даруяй живот. Воскресый из мертвых, Господи, слава Тебе!
Хор:	Богородичен Благословенную нарекий Твою Матерь, пришел еси на страсть вольным хотением, возсияв на Кресте, взыскати хотя Адама, глаголя ангелом: срадуйтеся Мне, яко обретеся погибшая драхма. Вся мудре устроивый, Боже наш, слава Тебе!
Хор:	7 глас Разрушил еси Крестом Твоим смерть, отверзл еси разбойнику рай; мироносицам плач преложил еси и Апостолом проповедати повелел еси; яко воскресл еси, Христе Боже, даруяй мирови велию милость.
Хор:	Богородичен >Яко нашего воскресения сокровище, на Тя надеющыяся, Всепетая, от рова и глубины прегрешений возведи; Ты бо повинныя греху спасла еси, рождшая Спасение наше. Яже прежде рождества Дева, и в рождестве Дева, и по рождестве паки пребываеши Дева.
Хор:	8 глас С высоты снизшел еси, Благоутробне, погребение приял еси тридневное, да нас свободиши страстей, Животе и Воскресение наше, Господи, слава Тебе!
Хор:	Богородичен Иже нас ради рождейся от Девы и распятие претерпев, Благий, испровергий смертию смерть и воскресение явлей яко Бог, не презри, яже создал еси рукою Твоею; яви человеколюбие Твое, Милостиве, приими рождшую Тя Богородицу, молящуюся за ны, и спаси, Спасе наш, люди отчаянныя.